U3F1ZWV6ZTIwOTM5NTg3MTQ0MjEyX0ZyZWUxMzIxMDUwMjIzNDU4Mw==

حجب مواقع افلام عديدة في دولة مصر بسبب حقوق الطبع والنشر منها EgyBest




مواقع كتير زي Egybest و Cimaclub تم حجبها في مصر. تزامن الحجب دا جاي مع اطلاق شركة الانتاج الاعلامي المصرية المعروفة ب اعلام المصريين ابليكشن اسمه watch it وحطت عليه تقريبا كل المسلسلات اللي بتتعرض في رمضان مقابل ١٠٠ جنيه في الشهر.
الحجب لما جه في الوقت دا اقتنع الناس كلها ان السبب هو صدور ابليكشن watch it دا واللي تقييمه حاليا ١,٢ من ٥ على جوجل بلاي ستور لانه واحد من اسوأ التطبيقات في نظري ونظر الكثيرين من حيث الشكل والتطوير والخدمة المقدمة.
بالرغم ان للابليكشن دا دور اساسي في حجب المواقع دي، الا انه مش السبب الوحيد. Egybest و Cimaclub مواقع تندرج تحت مسمى مواقع عرض المحتوى المقرصن pirated content websites القرصنة الالكترونية تعتبر جريمة يعاقب عليها القانون في دول أمريكا واوروبا وفي مصر كمان. الا انه في مصر، الحكومة بتتحرك بمزاجها بس.
هيئة تنمية صناعة التكنولوجيا او اختصارا ايتيدا itida هى اللي المفروض بتحمي حقوق الملكية الفكرية الخاصة بالمحتوى الرقمي والالكتروني وبتتعاون مع جهات انفاذ القانون (البوليس) والجهات القضائية (النايب العام والمحاكم الاقتصادية) علشان يواجهوا ظاهرة القرصنة الالكترونية. و بالرغم من ان نظريا الكلام دا كويس الا اننا مسمعناش عن تصرف او اجراء صارم ورادع ضد الجهات المقرصنة من قبل.
ايجي بست على صفحتهم الرسمية على فيسبوك اعلنوا انها النهاية وان الموضوع اكبر بكثير من مجرد حجب الموقع من قبل السلطات المصرية. ودا ان دل على شيء يدل على ان في تحرك قانوني ضدهم ممكن يؤدي الى سجن القائمين على الموقع في حالة عدم اغلاقهم للخدمة دي.
نيجي لصلب الموضوع بقى، هل اللي Egybest و Cimaclub بيعملوه دا صح؟ لا طبعا مش صح. القرصنة جريمة وسرقة. المواقع دي بتسرق افلام واغاني ومسلسلات والعاب وتنزلها ببلاش للناس وكمان بتكسب فلوس من وراها بدون وجه حق. خليني اديك مثال:
لو انت بتشتغل في شركتك على مشروع معين وقعدتو فيه سنين وتعبتوا كل يوم في تنفيذه وجت شركة تانية سرقته زي ماهو وعملته. ايه اول حاجة هتعملها؟ هترفع قضية عليهم وتبقى جنايات. نفس الكلام ينطبق على المحتوى الرقمي. اي محتوى سواء افلام او اغاني او العاب بيتكلف وقت ومجهود وفلوس علشان يتعمل.
مصدر اساسي لرزق المنتج هو الفلوس اللي بيكسبها من ورا الفيلم او البوم الاغاني. مصدر اساسي لرزق المطور او المبرمج هو التطبيق او اللعبة. لما انت تيجي تسرق دا وتخليه ببلاش للناس، اكيد مش هتتبسط من حاجة زي كدا وهتحس ان مجهودك وتعبك ضاع في الارض. انا شخصيا كوني مبرمج اكيد هبقى متضايق لو حد سرق فكرة موقع او تطبيق خاص بيا ونفذها، مابالك بقى لو سرق تطبيق انا مطوره من اوله لاخره بحذافيره ونزلو ببلاش وبقى يكسب كمان من وراه؟ اكيد حاجة تعصب.
ايه البدائل؟ الحاجات اللي بنشوفها دي غاليه اوي نشوفها ازاي؟ زي ما اتكلمنا عن نقطة تعب ومجهود القايمين على المحتوى اللي بيتسرق دا، خلونا نتكلم على البدائل المتاحه. في الاغاني مثلا، عندك تطبيق زي انغامي جايبلك كل الاغاني ببلاش ولو مش عايز اعلانات وعايز تنزل اوفلاين وتسمع الحصريات بتدفع مبلغ رمزي في الشهر بتبدا من ٢٠ جنيه. نفس الكلام ينطبق على تطبيقات زي netflix و wavo. اشتراك شهري رمزي نسبيا مقابل مكتبات ضخمة من الافلام والمسلسلات. بالنسبة للالعاب والتطبيقات، زي ما في منها كتير بمقابل مادي الا ان في كتير ببلاش. تطبيقات كتير بقت تعمل اشتراك شهري مقابل خدماتها بدل من انك تشتريها دفعة واحدة.
ونصيحة تكنولوجية هامة، معظم التطبيقات اللي بيتم قرصنتها بيتم تعديلها وبيكون كتير جدا جواها برمجيات خبيثة ممكن تسرق منك بيانات او تعمل حتى باب خلفي backdoor في جهازك يتيح للهاكر انه يدخل على جهازك في اي وقت ويتابع نشاطك. المقرصنين في الاول وفي الاخر حرامية مش بياعين سبح.
ايجي بست حاليا اتحجب في مصر لكن شغال من دول تانيه الا ان خوادمه بتقفل واحد ورا التاني ومش معروف اذا كان هيرجع تاني او لا.
ليست هناك تعليقات
إرسال تعليق

إرسال تعليق

الاسمبريد إلكترونيرسالة